Hoxe pola mañá tivemos unha visita moi especial no colexio: Borxa González Castro, creador de Orgullo Galego, estivo connosco para contarnos sobre as antigas tradicións de Defuntos en Galicia.
A través da súa canle de Twitch e da súa conta de Instagram e de Facebook, Borxa leva anos divulgando e estudando os ritos máis típicos desta festa, e grazas a el aprendemos moitas cousas fascinantes.
Falounos das cabazas decoradas, das avelaíñas, que se cría que eran ánimas dos devanceiros, e da Santa Compaña, unha misteriosa procesión de ánimas que aparecía nas noites escuras.
Ademais, explicounos que, en tempos, deixábase a mesa posta na noite de Defuntos para que os espíritos puidesen “cear” e non se varría a casa polas noites, para non botar fóra as ánimas que viñan a visitarnos.
Contounos tamén sobre as curuxas, corvos e mouchos, animais dos que se pensaba que traían "malos" presaxios.
Tamén nos contou sobre os colares de zonchos, feitos de castañas cocidas, que os nenos levaban ao cemiterio para honrar aos defuntos:
Borxa ensinounos esta fermosa foto dos anos 60, que se atopa no Museo do Pobo Galego, na que podemos ver a unha nena galega cun colar de zonchos:
Fíxoa Gustav Henningsen, un home que no ano 1965 chegou a unha pequena aldea de Galicia para saber máis sobre as bruxas, sobre as meigas.
Gustav era un investigador de Dinamarca, un país do norte de Europa, e quería descubrir misterios e historias antigas. Pero o que lle sucedeu foi aínda máis especial: viviu dous anos en Ordes, preto de Santiago, e aproveitou para coñecer as tradicións, os ritos e a música que a xente daquela practicaba.
Grazas a el, hoxe sabemos moito sobre como era esa vida, que en parte xa desapareceu, pero que el axudou a gardar para sempre.
No seguinte enlace podemos escoitar a mesma voz deste estudioso das tradicións, nun podcast da RTVE:
"Habelas, hainas", o legado de Gustav Henningsen
